AREWASTARBLOG: Video: Kalli Yadda Ake Hada Connection Na Yadda Z...

DAKIN LABAREN HAUSA 23 sep 2019 KARKEN ALEWA KASA, BATURE GAGARE Page 1 Episode 1 KARKEN ALEWA KASA, BATURE GAGARE Daga littafin Karshen Alewa Kasa Na Bature Gagare (c) NNPC Nigeria BABI NA FARKO TSAUNIN GWANO Tin kwal, Tin kwal, kwal! Tin kwal, Tin kwal Kwal… Mai yin shela ya bar kada kugensa domin ya yi jawabi a wani dan lungu da ya shigo. Ya kafa hannu a baki yayi kira, “Hyai, hyai, ina mazajen Tsaunin Gwano, sarkin kira ya gaishe ku. Bayan gaisuwa ya ce a fada muku lokaci ya yi wanda duk mai ji da kanshi ya shirya…” Ya wuce gaba yana kada kuge yana fadar sako rariya rariya. Hantsi ya ajiye kokon da ya gama shan burkutu da shi, ya yi wata doguwar mika ya yi murmushi, “To fa mutane, ga Audun makeri can yana buga kugen tasa. Yaya ka ji Mailoma?” Wani saurayi da ake kira Mailoma yana zaune a kan wani buzu da aka yi da fatar biri ya miko hannu suka tafa, ”Haba Hantsi,” in ji shi, “Ai ni nan wurin duk sun tsima ni kuma, sai na ji ma giyar nan duk ta fita raina.” Sai wuf ya mike tsaye gaban Hantsi yana gyaran lagen gwadonsa. Yace, “Bara kuwa an yi farauta da sa’a. Ka tuna lokacin da muka darkaki katuwar barewar nan? Wuu, an yi tsiya ranar nan ka ji.” Hantsi ya kara ciko kokonsa da giya ya ce, “A wannan rana ai duk tsawon raina ba zan iya mantawa da ita ba. Ko ba ranar da kuka goge raini ba da Dano dan sarkin Arna? Lallai da ban sa baki ba ai da kun yi danyen aiki, ya miko masa giya cikin koko, Mailoma ya karba ya ce, “Ai da ranar nan sai na kas shi aradu.” Sai ya daga hannuwa sama yana kirari shi daya. Can sai ya duka ya dauko wani goran giya wanda suka shanye yace, “Amshi nan Hantsi ka buga mini takena in dan fara yi kafin gobe da safe ta yi.” Hantsi ya goge bakinsa ya yi dariya ya gyara zama, “To matsa can baya idan rawa zaka yi. Kada ka yi mana asarar giya, na ga kana tangadi.” Sai ya sami wani dan iccen ya fara kida da gora, shi kuma Mailoma ya koma bari daya yana takawa yana kirarin da ya saba yi: Ni ne na bara ni ne na bana, Kuma ni ne na shekarar basasa. Ni ne na Hantsi ba mamaki, Mijin Tayani dogon yaro. Samun irin ku sai an tona. Yaro ko kana musu in ci ubansa. Dano ya buga damu ya kasa… Sai ya ci gaba da rawa yana tsalle tsalle. Hantsi kuwa yana tsugune yana barka dariya, “To bari mu sake kida yanzu,” in ji shi. “Bari in buga maka “Aci lugui-lugui” ka taka.” Da ya sake kida, sai Mailoma ya dafe kansa askakke da hannu daya, ya daga gudan a sama ya yi ruri, “Wayyahu! ….. Ihuuu!!” Wani tsoho wanda yake zaune yana jemar fata ya firgita ya kwatsa musu tsawa, “Yaya haka? Wadanne irin yara ne haka marasa ladabi. Don sakarcin banza sai a rasa wajen ihu sai cikin gida.” Suka bar abin da suke yi suka juyo wajen shi suna harara wai don ya katse musu jin dadi. Tsohon nan ya dubi Mailoma ya ce, “Kai kuma ina zuwa gonar ka debo ma jakai kara, hala ma ya sha ruwa?” Mailoma ya dan sunne kai yana murmushi, “A’a Baba, niyyata in tashi mu tafi ni da Tayani idan giyar nan ta kare.” Dan tsohonnan ya ce, “Zancen banza, ga shi har maraice zai yi ka shantake?” Shi Wannan dan tsohon sunansa Chiwake. Duk garin Tsaunin Gwano da kewaye an san shi da yin jima. Wannan sana’a da yake yi ta sa a kullum ba ya rasa abin yin kayan miya. Mailoma da Hantsi duk ‘ya’yansa ne, kuma su kadai ne gareshi. Su kuma yaran ‘yan biyu ne, kuma a halin yanzu karfinsu ya kawo sosai. Mailoma shekarunsa sha bakwai. Yana da tsawo gwargwadon shekarunsa. Yaro ne mai hali da kyau, kuma ga rashin tsoro. Tun yana dan shekara shida Chiwake yake tafiya da shi wajen farauta. Sukan yi kamar wata guda a Jeji suna farauta ba su shigo gari ba, amma Mailoma ko kuka ba ya yi musu ya ce yana son zuwa gida. STOP POINT A gaban shi sai mazaje su bi naman jeji a guje su kama su yanka. Wani lokaci ma ka ga an harkume da fada wajen rabon nama ana buge buge da yanke-yanken juna. Tun yana tsoron irin wadannan miyagun abubuwan har ya zo yana sha’awarsu. Hantsi kuwa natsatsen yaro ne wanda ba ya son yawan fitinu. Duk yawanci idan za a je farauta shi ya fi son ya tsaya gida ya yi jima a maimakon ya je yawon banza a jeji. Shi yasa wani lokaci sai samari su rika kiransa na-mata. “Tayani,” Mailoma ya yi kira. “Tayani ina kika shige ne?” Wata murya daga can wajen da ake daure dabbobi ta ce, “Haba ga ni nan zuwa. Ina jika igiyoyi ne.” Mailoma ya yi kira da karfi, “to yi maza ki kare mana. Ga Baba nan za ya cinye ni danye.” Mahaifiyarsu Mailoma ta baro tukunyar miya da tsumangiya a hannu ta nufo Mailoma a fusace. Shi kuma kafin ta iso wurin shi sai ya fita waje da gudu. Sauran mutanen gida suka yi ta dariya. Tayani ta fito waje da igiya a hannu domin su tafi gona. Sai dariya take yi ma mijinta saboda koro shi da aka yi. Wannan yarinya Allah ya ba ta wani abu wai shi kyau. Cikakkiyar budurwa ce, wadda yanzu shekarunta daya da rabi da auren Mailoma. Ita ba a yi mata irin tsagarsu ta Maguzawa ba, shi ya sanya kyawon nata ya kara fitowa sosai da sosai. Bayan haka ga kuma kirar jiki wajen Tayani kamar su goga da Amina sarauniyar Zazzau. Ba ta da yawan magana kamar mijinta, amma duk lokacin da ta yi sai mutum yaji kamar mawakiya don zakin murya. A takaice ma dai duka mutanen gari su a tsammaninsu wannan yaron ya yi mata asiri ne har ta yarda ta aure shi. Ita ce wadda cikin masu neman auren ta har da su Dano dan Sarkin Arna. Amma duk a wofi; ta tsaya a kan Mailoma sai an aura mata shi har iyayen ta suka gaji suka amince. “To mu tafi gonar ko mu dawo da wuri,” Tayani ta ce. Mailoma ya dube ta ya ce, “Tayani bana son kina zuwa gona kullum. Yanzu duk za ki lalace jikinki ya zama irin na Marka kishiryar Inna.” Tayani ta yi murmushi irin wanda yake sare ma mazaje zukatansu, ta dube shi da idanunta masu kamar auduga ta ce, “Dubi jikina.” Yaro ya karbi hannun da ta miko masa yana shafawa. Tayani fara ce kamar bafillatana. Ta ce, “Shekara guda ke nan ina zuwa daji tare da kai, amma ban sake wata kama ba, yanda ka sanni a da haka nake yanzu. Ko kuwa yau giyar ta fada maka karya ne?” at 07:45 Share No comments: Post a Comment Links to this post Create a Link ‹ › Home View web version Powered by Blogger.